دەوڵەمەندترین سەرچاوەکانی پرۆتین کامیان هەڵدەبژێریت... هێلکە یان ئەڤۆگادۆ

گومانی تێدا نییە زیادکردنی خۆراکی دەوڵەمەند بە پرۆتین بۆ خۆراک، جا مرۆڤ هەوڵی دابەزاندنی کێشی یان باشترکردنی هێزی ماسولکەکانی بدات، دەتوانێت جیاوازییەکی گەورە دروست بکات، بەڵام هەڵبژاردنی لەنێوان باشترین خۆراکی دەوڵەمەند بە پرۆتین وەک گرنگترین خواردن دەمێنێتەوە، بەتایبەتی کە هەڵبژاردنی نێوان دوو خۆراکی دەوڵەمەند بە پرۆتین کارێکی قورسە.

 

هێلکە یان ئەڤۆگادۆ؟

توێژینەوەیەکی نوێی هیندستان ئاشکرایکردووە، ئەڤۆگادۆ میوەیەکی دەوڵەمەندە بە ماددە خۆراکیەکان و دەوڵەمەندە بە چەورییە تەندروستەکان، بەتایبەت چەورییە تاکە ناتێرەکان، کە تەندروستن بۆ دڵ و یارمەتی دابەزاندنی کۆلیسترۆڵی خراپ دەدەن.

ئاماژەی بەوەشکرد، ئەڤۆگادۆیەکی قەبارە مامناوەند نزیکەی ٢٤٠ کالۆری و ١٢ گرام کاربۆهیدرات (زۆربەی ڕیشاڵ) و ٣ گرام پرۆتین و ١٥ گرام چەوری تێدایە.

هەروەها سەرچاوەیەکی نایابی ڤیتامینەکانی وەک B, K, E و C. هەروەها ئەڤۆگادۆ دەوڵەمەندە بە کانزاکانی وەک پۆتاسیۆم کە یارمەتی ڕێکخستنی پەستانی خوێن دەدات، بەپێی تایمز ئۆف هیندستان.

کۆلیسترۆڵی خراپ دادەبەزێنێت و ئەگەری تووشبوون بە نەخۆشییەکانی دڵ و خوێنبەرەکان کەمدەکاتەوە.

ئەو ڕیشاڵانەی تێدایە یارمەتی باشترکردنی هەرسکردن دەدات و ئاستی شەکری خوێن ڕێکدەخات و بەشدارە لە هەستکردن بە تێری، ئەمەش وایکردووە کە خۆراکێکی نایاب بێت بۆ کۆنترۆڵکردنی کێش.

جگە لەوەش دەوڵەمەندە بە پۆتاسیۆم، کە ڕەنگە یارمەتیدەر بێت بۆ پاراستنی ئاستی پەستانی خوێن بە شێوەیەکی تەندروست. هەروەها ڤیتامینەکانی ناو ئەڤۆگادۆ تەندروستی پێست بەرەوپێش دەبەن و پشتگیری لە کارکردنی بەرگری لەش دەکەن و بەرەنگاریی فشاری ئۆکسجین دەبنەوە بەهۆی ڕێژەی دژە ئۆکسێنەرەوە.

هەروەها ئەڤۆگادۆ دەوڵەمەندە بە ترشی چەوری ئۆمیگا 3 و ترشی فۆلیک کە پاڵپشتی کارکردنی مێشک و یادەوەری دەکات و مەترسی دابەزینی توانای مەعریفی کەمدەکاتەوە. هەروەها ڕێژەی کەمی کاربۆهیدرات و بەرزی ڕیشاڵی یارمەتی ڕێگریکردن لە بەرزبوونەوەی شەکری خوێن دەدات، ئەمەش وایکردووە بۆ نەخۆشانی شەکرە زۆر باش بێت.

سەبارەت بە هێلکە، توێژینەوەکە دەریخستووە کە سەرچاوەیەکی گەورەی پرۆتینی تەواون، بەو پێیەی هەر نۆ ترشە ئەمینییە گرنگەکان دابین دەکات.

هەروەها یەک هێلکەی گەورە نزیکەی ٧٠ کالۆری و ٦ گرام پرۆتین و ٥ گرام چەوری (لەوانەش چەورییە تەندروستەکانی ناتێركان) و هیچ کاربۆهیدراتێکی تێدا نییە.

هەروەها هێلکە پڕە لە ماددە خۆراکیەکانی وەک ڤیتامین B12 و ڤیتامین D و کۆڵین و سیلینیۆم. هەروەها لوتین و زیاکسانتینی تێدایە کە سوودی بۆ تەندروستی چاو هەیە.

هەروەها سەرچاوەیەکی بەهێزی پڕۆتینە و پاڵپشتی تەندروستی ماسولکەکان دەکات، هەروەها زۆرجار بە ستانداردی زێڕین دادەنرێت بۆ کوالیتی پرۆتین بەهۆی پرۆفایلی ترشە ئەمینییەکەیەوە، بەتایبەتی کە ئەو کۆلینەی لە هێلکەدا هەیە پێویستە بۆ تەندروستی مێشک و کارکردنی مەعریفی، لە کاتێکدا لوتین و زیاکسانتین پاڵپشتی تەندروستی چاو دەکەن بە پاراستنی تۆڕی چاو.

هەروەها ڕێژەی گلایسیمیکی تاڕادەیەک کەمی هەیە، کە یارمەتی ڕێکخستنی ئاستی شەکری خوێن دەدات و هەستکردن بە تێربوون بەرەوپێش دەبات. هەروەها گشتگیرە و دەتوانرێت بخرێتە ناو ژەمە جۆراوجۆرەکانەوە.

کامیان باشترە؟

هەڵبژاردنی نێوان ئەڤۆگادۆ و هێلکە تا ڕادەیەکی زۆر بەندە بە ئامانجە تەندروستییە کەسییەکان و پێداویستییە خۆراکییەکانتەوە. ئەگەر بەدوای خۆراکێکدا دەگەڕێیت کە بتوانێت تەندروستی دڵ بەرز بکاتەوە و کۆلیسترۆڵ کەم بکاتەوە و چەوری تەندروست بۆ تەندروستی گشتی دابین بکات، ئەوا ئەڤۆگادۆ هەڵبژاردەیەکی نایاب و باشە، بەتایبەتی کە بڕێکی باش لە ڕیشاڵەکان دابین دەکات، کە ئەمەش بۆ هەرسکردن و کۆنترۆڵکردنی کێش باشە.

لە لایەکی ترەوە ئەگەر کەسێک بەدوای زیادکردنی وەرگرتنی پرۆتینەکانیدا دەگەڕێت و پشتگیری چاککردنەوەی ماسولکەکانی بکات و سوود لە ماددە خۆراکییە کوالیتی بەرزەکان وەربگرێت کە بە ئاسانی هەڵدەمژرێن وەک ڤیتامین B12 و کۆڵین، هێلکە کاندیدێکی ڕوونە..