٥ نیشانەی سەرەتایى، کە نیشانەی تووشبوون بە نەخۆشی شەکرەیە... پشتگوێیان مەخە!

نەخۆشی شەکرە حاڵەتێکی درێژخایەنە و کاریگەری لەسەر چۆنیەتی پرۆسێسکردنی گلوکۆزی جەستە هەیە، کە سەرچاوەی سەرەکی وزەیە بۆ خانەکان. دکتۆرەکان دەڵێن زۆر کەس بەبێ دەستنیشانکردن نەخۆشییەکە بۆ ماوەیەکى زۆر دەمێننەوە، چونکە نیشانە سەرەتاییەکان پشتگوێ دەخەن یان دەگەڕێننەوە بۆ هۆکاری دیکە.

جەخت لەوە دەکەنەوە کە ناسینەوەی نیشانەکان دەتوانێت یارمەتیت بدات بۆ وەرگرتنی چاودێری پزیشکی لە کاتی خۆیدا، کە لەوانەیە ڕێگری بکات لە ئاڵۆزییە گەورەکانی وەک تێکچوونی دەمارەکان بەتایبەتى تۆرى چاو، نەخۆشییەکانی دڵ، یان کێشەی گورچیلە.

 

لێرەدا ٥ نیشانەی سەرەتایی دەخەینەڕوو، کە دەریدەخات تووشی نەخۆشی شەکرە بوویت:

 

تینوێتی زۆر و زۆر میزکردن

یەکێک لە دیارترین نیشانەکانی نەخۆشی شەکرە هەستکردنە بە تینوێتییەکی زۆر، لەگەڵ میزکردنی زۆر. ئەمەش لەبەرئەوەی بەرزبوونەوەی ئاستی شەکر لە خوێندا وادەکات گورچیلەکان زیاتر کاربکەن بۆ فلتەرکردن و هەڵمژینی گلوکۆزی زیادە. کاتێک گورچیلەکانت ناتوانن بەردەوام بن، گلوکۆز لە میزەکەتدا دەردەچێت و شلەمەنیەکان لە جەستەت دەکێشێت و تینووت دەکات.

 

دابەزاندنی کێش بێ هیچ هۆکارێک

دابەزینی لەناکاوی کێش دەتوانێت مەترسیدار بێت و زۆرجار پەیوەندی بە کێشە تەندروستییە دیارەکانەوە هەیە، لەوانە نەخۆشی شەکرە. کاتێک جەستەت ناتوانێت بە شێوەیەکی کاریگەر ئەنسۆلین بەکاربهێنێت بۆ پرۆسێسکردنی گلوکۆز بۆ وزە، ئەوا لەبری ئەوە دەست دەکات بە تێکشکاندنی چەوری و ماسولکەکان.

 

زیادبوونی هەستکردن بە برسێتی سەرەڕای خواردنی بەردەوام

ئەو کەسانەی نەخۆشی شەکرەیان هەیە زۆرجار هەست بە برسێتییەکی زۆر دەکەن، چونکە جەستەیان کێشەیەکی زۆری هەیە بۆ گۆڕینی خۆراک بۆ وزەی بەکارهێنراو. کەمی ئەنسۆلین یان نەتوانینی بەکارهێنانی بە شێوەیەکی کارا دەبێتە هۆی ئەوەی گلوکۆز لە خوێندا بمێنێتەوە لەبری ئەوەی بچێتە ناو خانەکانەوە بۆ دابینکردنی وزە. ئەم برسێتییە بەردەوامە، بەتایبەتی دوای نانخواردن، دەبێتە هۆی زیادەڕۆیی لە خواردندا.

 

لێڵبوونى بینین

بەرزبوونەوەی ئاستی شەکر لە خوێندا کاریگەری لەسەر بینایی چاوەکان دەبێت و دەبێتە هۆی لێڵبوونى بینین.

 

چاکبوونەوەی خاو و زوو زوو تووشبوون بە هەوکردن

نەخۆشی شەکرە توانای جەستە تێکدەدات بۆ چاککردنەوەی برینەکان بە خێرایی و بەرەنگاربوونەوەی هەوکردن. بەرزبوونەوەی ئاستی شەکر لە خوێندا زیان بە بۆرییەکانی خوێن و دەمارەکان دەگەیەنێت، سوڕی خوێن کەمدەکاتەوە و دەبێتە هۆی ئەوەی لەش قورس بێت بۆ گەیاندنی ماددە خۆراکییە پێویستەکان بۆ شوێنە تووشبووەکان.

 

چی دەکەیت؟

 شارەزایانی تەندروستی جەخت لەوە دەکەنەوە کە ئەگەر هەست بەم نیشانانە کرد، پێویستە دەستبەجێ سەردانی پزیشک بکەیت و چاودێری خۆراکی خۆت بکەیت و خواردنی شەکرەکان کەم بکەیتەوە و تا دەتوانیت چالاکیی جەستەیی بپارێزیت و بەرزکەیتەوە.