مایکرۆسکۆپ چی ئاشکرا دەکات؟ ڕاستییە ترسناکەکانی ناو جانتای ماکیاژەکەت!

زۆربەمان ڕەنگە بایەخ بە بەرواری بەسەرچوونی سووراو یان ماسکاراکەمان نەدەین، بەڵام توێژینەوەیەکی نوێی زانکۆی "لەندەن میترۆپۆلیتان" هۆشدارییەکی توند دەدات. ئەوەی لە ژێر مایکرۆسکۆپدا بینراوە، تەنها ماکیاژ نییە، بەڵکو کۆمەڵگەیەکی ترسناکە لە بەکتریا وکەڕوو!

ئەیلاینەر؛ پیسکەری ژمارە یەک!

دکتۆر "ماریا پیلار" دوای پشکنینی ٧٠ بەرهەمی جیاواز، بۆی دەرکەوت کە ئەیلاینەر پیسترین پارچەی ناو جانتای ماکیاژە. بەهۆی بەرکەوتنی بەردەوام لەگەڵ پێڵوی چاو، بەکتریای ستافیلۆکۆکۆس کۆدەکاتەوە کە دەبێتە هۆی هەوکردنی پێست و سوربوونەوەی چاو.

بەکتریای ڕیخۆڵە لەناو ماکیاژدا!

یەکێک لە شۆککەرترین دۆزینەوەکان، بوونی بەکتریای E. coli (بەکتریای ناو پیسایی) بوو لەسەر هەندێک بەرهەم. ئەمە چۆن ڕوودەدات؟

1. شۆردنی دەست: بەکارنەهێنانی سابوون پێش ماکیاژکردن.

2. حەمام: هەڵگرتنی ماکیاژ لە حەمامدا، چونکە لە کاتی ڕشتنی ئاوی ئاودەستدا، دڵۆپە وردەکان تا دوو مەتر بڵاو دەبنەوە و لەسەر کەرەستەکانت دەنیشن.

---

چ مەترسییەک بۆ تەندروستیت هەیە؟

بوونی ئەم میکرۆبانە و کەڕووى وەک کاندیدا لەناو ماکیاژدا، دەبێتە هۆی:

• هەوکردنی کۆئەندامی هەناسە و میزەڵدان.

• کەڕووى دەم و پێست.

• لە حاڵەتی هەبوونی برین لەسەر دەموچاو، بەکتریاکان دەچنە ناو خوێن و مەترسییەکە گەورەتر دەکەن.

---

٥ هەنگاوی زێڕین بۆ پاراستنی خۆت:

1. دەستت بشۆ: هەرگیز بێ شۆردنی دەست دەست لە دەموچاوت مەدە.

2. ماکیاژ مەگۆڕەوە: بە هیچ شێوەیەک کەرەستەی کەسی تر یان "تێستەری" ناو دوکانەکان بەکارمەهێنە.

3. فڵچەکان پاک بکەرەوە: هەفتانە بە ئاوی گەرم و سابوون ئیسفەنج و فڵچەکانت بشۆ و لێگەڕێ با بە هەوا وشک ببنەوە.

4. بەروارەکان بپشکنە: ئەگەر بەرهەمێک بەرواری نەمابوو، دوای ٣ مانگ فڕێی بدە (بەتایبەت ماسکارا و ئەساسی شل).

5. شوێنی گونجاو: ماکیاژ لە شوێنی شێدار و تاریک (وەک حەمام) دامەنێ.