کاستەنە؛ شاژنی میوەکانی زستان و کلیلێکی زێڕین بۆ تەندروستی خانمان

لەگەڵ هاتنی وەرزی سەرما، "کاستەنە" کە بە (ئەبو فەروە)ش دەناسرێت، دەبێتە میوانێکی ئازیز لە کۆڕ و کۆبوونەوەکانماندا. بە پێچەوانەی زۆربەی گوێز و چەرەزاتەکان، کاستەنە چەورییەکی کەمی تێدایە و دەوڵەمەندە بە کاربۆهیدراتە ئاڵۆزەکان، ئەمەش وای لێدەکات سەرچاوەیەکی بێ وێنەی وزە بێت بە کالۆرییەکی کەم.

سوودە بنەڕەتییەکانی کاستەنە چیین؟

کاستەنە تەنها تامێکی خۆش نییە، بەڵکو کۆگایەکی دەوڵەمەندە بە ڤیتامینەکانی (B, C, E) و کانزا گرنگەکانی وەک مەگنیسیۆم، پۆتاسیۆم و ئاسن. پسپۆڕانی خۆراک ئاماژە بەوە دەکەن کە بەهۆی بوونی بڕێکی زۆر لە ڤیتامین C، بەرگری لەش بەهێز دەکات و دژی هەڵامەتی وەرزی دەوەستێتەوە.

کێش دابەزاندن و ڕێکخستنی شەکر

بۆ ئەو خانمانەی دەیانەوێت کێشیان دابەزێنن، کاستەنە باشترین هاوڕێیە؛ چونکە ڕیشاڵێکی زۆری تێدایە کە هەستی تێربوونت پێدەبەخشێت بۆ ماوەیەکی درێژ. هەروەها بەهۆی نزمیی "ئیندێکسی گلایسیمیک"، ئاستی شەکری خوێن بە جێگیری دەهێڵێتەوە و ناهێڵێت کتوپڕ بەرز ببێتەوە.

پارێزەری دڵ و خوێنبەرەکان

کاستەنە دژی کۆلیسترۆڵی خراپ دەوەستێتەوە. بوونی ترشە چەورییە تاک نەتێرەکان و پۆتاسیۆم یارمەتی ڕێکخستنی پەستانی خوێن و پاراستنی تەندروستی دڵ دەدەن. هەروەها بەهۆی بوونی ئاسن، مەترسی تووشبوون بە کەمخوێنی کەمدەکاتەوە، کە کێشەیەکی باوی زۆرێک لە خانمانە.

سوودەکانی بۆ دووگیانی

بەهۆی دەوڵەمەندی بە "ترشی فۆلیک" (ڤیتامین B9)، کاستەنە خواردنێکی نموونەییە بۆ ئافرەتانی دووگیان، چونکە یارمەتی گەشەی کۆرپەلە دەدات و لە کەموکوڕی بۆری دەمار دەیپارێزێت.

چۆن هەڵیبگرین و بیخۆین؟

بۆ ئەوەی سوودە ڕاستەقینەکانی وەربگریت، باشترە بە برژاوی یان کوڵاوی بیخۆیت. کاستەنە پێویستە لە شوێنی سارد و ناو سەلاجە هەڵبگیرێت تا بۆ ماوەیەکی درێژ بە فرێشی بمێنێتەوە و تووشی قەوزە و تێکچوون نەبێت. بۆ زانیارى زیاتر بگەڕێتەوە. بۆ زانیار زیاتر بگەڕێرەوە بۆ ئەم بابەتە